“Nəsr” surəsi, oxunuşu və asanlaşdıran təfsiri

“Nəsr” surəsi Qurani-kərimin 110-cu surəsidir. Mədinədə nazil olmuşdur. Üç ayə, 19 kəlmə və 79 hərfdən ibarətdir.

بِسْمِ اللَّهِ الرَّحْمَٰنِ الرَّحِيمِ

Bismillə̃hir-rahmə̃nir-rahἶm

Rəhman, Rəhim Allahın adı ilə.

إِذَا جَاءَ نَصْرُ اللَّهِ وَالْفَتْحُ

İzə̃ cə̃`ə nasrullãhi vəl-fəth (1)

Allahın köməyi və fəth gəldiyi zaman

وَرَأَيْتَ النَّاسَ يَدْخُلُونَ فِي دِينِ اللَّهِ أَفْوَاجًا

Və ra`əytən-nə̃sə yədxulũnə fἶ dἶnillə̃hi əfvãcə̃ (2)

Və camaatı Allahın dininə dəstə-dəstə daxil olduqlarını gördükdə

فَسَبِّحْ بِحَمْدِ رَبِّكَ وَاسْتَغْفِرْهُ ۚ إِنَّهُ كَانَ تَوَّابًا

Fəsəbbih bihəmdi rabbikə vəstəğfirhu, innəhu kə̃nə təvvãbə̃ (3)

Həmd ilə Rəbbini təriflə və ondan bağışlanma dilə, çünki O, tövbələri qəbul edəndir.

(Qeyd: “Fəsəbbih bihəmdi rabbikə” – Allaha həmd-səna söyləməklə Onun şirkdən, nöqsan və eyblərdən uzaq bilməkdir. Burada zəruri qeyd vardır, o da Peyğəmbərin hansı əmələ görə tövbə edib, bağışlanma diləməsidir. Xüsusilə də Məkkənin fəthilə əlaqədar məsələlərdə Allahın Peyğəmbərin günahının bağışlanması, yaxud onun bundan əvvəl və sonrakı günahının əfv edilməsindən söz açılır. Əhli-Beyt tərəfdarları Peyğəmbərin hər bir günah və çirkinlikdən uzaq olduğunu və onun məsum olduğunu qeyd edirlər. Bu “günah” isə Peyğəmbərə Məkkə barədə vurulan tənələr idi. Xüsusilə Hüdeybiyyə sülhündə hətta bəzi səhabələr Peyğəmbəri günah etmiş hesab edirdilər. Bu sülhə görə onu danlayır, qınayırdılar. Məkkənin fəthi Peyğəmbərin haqlı olduğunu, onun özündən bir hərəkət etmədiyini sübuta yetirdi. Ayə demək istəyir ki, Peyğəmbər sizin ona nisbət verdiyiniz günahdan uzaqdır və Allah günah hesab etdiyinizi onun üçün əfv etmişdir. Burada Peyğəmbərin tövbə etməsi ilə bağlı çoxlu məsələlər vardır ki, zamanla onları qeyd edəcəyik)

Asanlaşdırılmış təfsir

Ey Peyğəmbər, sənin üçün Qüreyş kafirləri üzərində qələbə, habelə Məkkənin fəthi tamamlandıqda

Və insanların əksəriyyətinin toplu şəklində Allahın dininə – İslama daxil olduqlarını, müsəlman olduqlarını gördükdə

Bu baş verdikdə, Rəbbinə həmd-səna etməklə çoxlu təsbih söylə, Ondan çoxlu bağışlanma dilə. Çünki O, təsbih söyləyənlərin və bağışlanma diləyənlərin tövbəsini qəbul edəndir. Onları bağışlayır, rəhm edir və etdikləri tövbələri məqbul sayır. (Bu surə nazil olduqdan sonra Peyğəmbər Sübhanəkəllahummə, və bihəmdikə, Allahumməğfirli innəkə əntət-təvvabur-rəhim" zikrinidaha çox deməyə başladı. Bununla bildi ki, onun əcəli yaxınlaşmışdır. Məkkənin fəthi Ramazan ayında, hicrətin 8-ci ili baş vermişdi. Peyğəmbərimiz isə hicrətin 11-ci ili, səfər ayında vəfat etdi)

Hazırladı: Fərid Abdullah.